विशेष प्रतिनिधी
गोवा : गोव्यातील शिरगाव येथे प्रसिद्ध असलेल्या लयराई देवीच्या जत्रेत चेंगराचेंगरी झाल्याची घटना घडली आहे. शनिवारी पहाटे 3 वाजताच्या सुमारास मंदिरात ही घटना घडली. या घटनेमध्ये सात भाविकांचा मृत्यू झाला असून 70 जण जखमी झाले.
( Seven devotees die in stampede at Layrai Devi fair in Goa)
लयराई देवीच्या यात्रेला शुक्रवारपासून सुरुवात झाली आहे. पण यात्रेच्या दुसऱ्याच दिवशी घडलेल्या या घटनेमुळे या यात्रेला गालबोट लागले. या घटनेची माहिती मिळाल्यानंतर गोव्याचे मुख्यमंत्री प्रमोद सावंत यांनी रुग्णालयात जाऊन जखमींची विचारपूस केली. जखमींमधील काही भाविकांची प्रकृती चिंताजनक आहे.
गोव्यासह देशातील अनेकांचे श्रद्धास्थान असलेल्या लयराई देवीच्या यात्रेसाठी मोठ्या संख्येने भाविक यात्रेसाठी येत असतात. विशेषतः यावेळी काही पूजाविधी देखील केला जातो. दक्षिण गोव्यातील शिरगाव येथील हे मंदिर स्थानिक लोकांसाठी आणि जवळच्या भागातील भाविकांसाठी एक महत्त्वाचे आध्यात्मिक केंद्र आहे. या मंदिरामुळे परिसरात दारू आणि अंडी देखील निषिद्ध आहेत. सोबतच गावात कोणत्याही प्राण्याची हत्या देखील केली जात नाही. त्यामुळे या ठिकाणी चेंगराचेंगरीची घटना घडली कशी? असा प्रश्न निर्माण झाला आहे. यात्रेसाठी सुमारे एक हजार पोलिसांचा बंदोबस्त तैनात करण्यात आला होता. तर, प्रशासनाकडून सुद्धा संपूर्ण तयारी करण्यात आली होती. मात्र, असे असतानाही चेंगराचेंगरी झाली.
शुक्रवारी सुरू झालेल्या श्री देवी लयराईच्या यात्रेसाठी हजारो भाविक आले होते. तर, यात्रेच्या पहिल्याच दिवशी मुख्यमंत्री प्रमोद सावंत, त्यांच्या पत्नी, राज्यसभा खासदार सदानंद शेट तनावडे आणि आमदार प्रेमेंद्र शेट आणि कार्लोस फरेरा यांनी ही या ठिकाणी भेट दिली होती. पण आता चेंगराचेंगरीच्या या घटनेमागील नेमके कारण अद्याप कळू शकलेले नाही.
मंदिर प्रशासन आणि अधिकाऱ्यांनीही या घटनेला अधिकृत दुजोरा दिलेला नाही. परंतु प्राथमिक अहवालानुसार, गर्दी आणि योग्य व्यवस्था नसल्याने ही घटना घडली असा अंदाज आहे.