विशेष प्रतिनिधी
दाहोद : पंतप्रधान नरेंद्र मोदी गुजरातमधील दाहोद येथे भारताच्या पहिल्या 9000 हॉर्सपॉवर क्षमतेच्या इलेक्ट्रिक लोकोमोटिव्हचे उद्घाटन करणार आहेत. ‘मेक इन इंडिया’ अभियानाखाली भारतीय उत्पादन क्षेत्रात एक महत्त्वाचा मैलाचा दगड ठरणार आहे. ( Prime Minister Modi inaugurates countrys first 9000 HP electric locomotive in Dahod Gujarat)
या अत्याधुनिक लोकोमोटिव्हचे उत्पादन ₹20,000 कोटींच्या गुंतवणुकीतून उभारलेल्या दाहोद रेल्वे लोकोमोटिव्ह कारखान्यात करण्यात आले आहे. येत्या दहा वर्षांत 1,200 इंजिनांचे उत्पादन या केंद्रातून होणार असून, सुमारे 10,000 रोजगाराच्या संधी या प्रकल्पातून निर्माण होतील.
या लोकोमोटिव्हमुळे देशातील मालवाहतूक व्यवस्था अधिक शक्तिशाली आणि गतिमान होणार आहे. भारतीय रेल्वेच्या इतिहासात हे लोकोमोटिव्ह सर्वाधिक क्षमतेचे असून, यामुळे भारतीय रेल्वेच्या लॉजिस्टिक क्षमतेत मोठी वाढ होणार आहे. हे इंजिन फ्रान्सच्या अल्सटॉम कंपनीच्या सहकार्याने विकसित करण्यात आले असून, विद्युत वापरात उच्च कार्यक्षमता, कमी देखभाल खर्च, आणि अधिक भार वाहण्याची क्षमता यामुळे ते जगातील आघाडीच्या इंजिनांमध्ये समाविष्ट ठरणार आहे.
पंतप्रधान मोदींच्या नेतृत्वाखाली ‘मेक इन इंडिया’, ‘आत्मनिर्भर भारत’ आणि ‘गती शक्ती’ योजनांचा प्रभाव देशभर स्पष्टपणे दिसून येत आहे. दाहोदमधील हा प्रकल्प केवळ औद्योगिकदृष्ट्या महत्त्वाचा नसून, तो स्थानिक अर्थव्यवस्थेला चालना देणारा आहे.
रेल्वेमंत्री अश्विनी वैष्णव, गुजरातचे मुख्यमंत्री भूपेंद्र पटेल, आणि अल्सटॉमचे वरिष्ठ अधिकारी या समारंभाला उपस्थित राहणार आहेत. उद्घाटनानंतर पंतप्रधान मोदी स्थानिक तरुणांसोबत संवाद साधणार असून, रोजगार निर्मिती व उद्योग क्षेत्रातील संधी यावर भाष्य करतील.