काँग्रेसच्या माजी अध्यक्षा सोनिया गांधी यांचा इटलीतील वडिलोपार्जित संपत्तीत हिस्सा आहे. सोनिया गांधी यांनी राजस्थानमधून राज्यसभा निवडणुकीसाठी दिलेल्या प्रतिज्ञापत्रात इटलीतील वडिलांच्या संपत्तीत आपला वाटा असल्याचे सांगितले आहे. सोनिया गांधी यांचे वडिलोपार्जित घर लुईझियाना, इटली येथे आहे. त्यांच्या नामनिर्देशन तपशीलात, सोनिया गांधी यांनी त्यांच्या वडिलांच्या मालमत्तेतील त्यांच्या वाट्याचे मूल्य 26,83,594 रुपये सांगितले आहे.
सोनिया गांधींना त्यांच्या वडिलांच्या संपत्तीतील त्यांच्या वाट्याचे उत्पन्न मिळते. यातून उत्पन्न मिळवण्यासाठी सोनियांनी रिझर्व्ह बँकेकडून परवाना घेतला आहे. सोनिया गांधी यांच्याकडे एकूण 12.53 कोटींची संपत्ती आहे. 2019 च्या लोकसभा निवडणुकीनंतर 5 वर्षांत सोनिया गांधींच्या स्थावर आणि जंगम मालमत्तेत 72 लाख रुपयांनी वाढ झाली आहे.
सोनिया गांधी यांनी 2019 च्या लोकसभा निवडणुकीसाठी रायबरेलीमधून त्यांच्या प्रतिज्ञापत्रात एकूण 11.81 कोटी रुपयांची संपत्ती जाहीर केली होती. 5 वर्षांत सोनिया गांधींच्या संपत्तीची एकूण किंमत 72 लाख रुपयांनी वाढली आहे. सोनियांकडे 88 किलो चांदी आणि 1267 ग्रॅम सोने आणि दागिने आहेत.
राज्यसभा निवडणुकीसाठी दिलेल्या प्रतिज्ञापत्रात, सोनिया गांधी यांच्याकडे 5.88 कोटी रुपयांची 3 बिघे शेतजमीन आहे, तर 2019 च्या लोकसभा निवडणुकीत त्यांनी दिल्लीजवळील सुलतानपूर मेहरौलीमध्ये डेरमंडी गावात तीन बिघे जमीन आणि 12 बिघे 15 बिस्वा जमीन जाहीर केली होती. राज्यसभा निवडणुकीत दिलेल्या प्रतिज्ञापत्रात 12 बिघा जमिनीचा उल्लेख नाही. त्यावेळी दोन्ही जमिनींची किंमत 7.29 कोटी रुपये असल्याचे सांगण्यात आले.
सोनिया गांधी यांनी खासदार म्हणून मिळालेला पगार, रॉयल्टीतून मिळणारे उत्पन्न, बँक ठेवींवरील व्याज, म्युच्युअल फंडातून मिळणारा लाभांश, त्यांच्या उत्पन्नात भांडवली नफा यांचाही उल्लेख केला आहे. सोनिया गांधींना पुस्तकांची रॉयल्टी मिळते, सोनियांचे पेंग्विन बुक इंडिया, ऑक्सफर्ड युनिव्हर्सिटी प्रेस, आनंदा पब्लिशर्स, कॉन्टिनेंटल पब्लिकेशन यांच्याशी करार आहेत. त्यांना ऑक्सफर्ड युनिव्हर्सिटी प्रेसकडून 1.69 लाख रुपयांची रॉयल्टी मिळते.सोनिया गांधी यांच्याकडे स्वतःचे कोणतेही वाहन नाही. 2019च्या लोकसभा निवडणुकीच्या वेळीही सोनिया गांधी यांनी त्यांच्या मालकीचे कोणतेही वाहन असल्याचे जाहीर केले नव्हते.सो निया गांधी यांचे मागील 5 वर्षांतील वार्षिक उत्पन्न त्यांच्या आयकर विवरणपत्रात दाखवले आहे
सोनिया गांधी यांनी नॅशनल हेराल्ड प्रकरणात आपल्या विरोधात खटला सुरू असल्याचे सांगितले आहे. प्रतिज्ञापत्रानुसार, कलम 420, 120बी, 403, 406 अंतर्गत नवी दिल्लीच्या राऊस एव्हेन्यू न्यायालयात खटला प्रलंबित आहे. दिल्ली उच्च न्यायालयाने 22 फेब्रुवारी 2022 रोजी ट्रायल कोर्टाच्या प्रक्रियेला स्थगिती दिली आहे.