बीडमधील भारतीय जनता पक्षाचे आमदार सुरेश धस यांचा कार्यकर्ता खोक्या उर्फ सतीश भोसले याच्या घरावर आज बुलडोझर कारवाई करण्यात आली आहे. सहा दिवसांपासून फरार असलेला खोक्या भोसले याला उत्तर प्रदेशातील प्रयागराज येथून अटक करण्यात आली आहे. त्याला आज रात्रीपर्यंत बीडमध्ये आणले जाणार आहे.
खोक्यावर झालेल्या बुलडोझर कारवाईनंतर मुख्यमंत्री देवेंद्र फडणवीस यांनी म्हटले आहे की, खोक्या असो की बोक्या, की ठोक्या, सर्वांना ठोकणार. राज्यात गुन्हेगारांना थारा दिला जाणार नाही असा संदेश दिला आहे.
धनंजय मुंडे यांच्या राजीनाम्यानंतर सर्वच पक्षांच्या आमदारांच्या निकटवर्तीयांचे मारहाण आणि दादागिरीचे व्हिडिओ समोर येत आहे. मस्साजोगचे सरपंच संतोष देशमुख यांच्या हत्येप्रकरणी आवाज उठवणारे आमदार सुरेश धस यांचा कार्यकर्ता खोक्या भोसले याचा एका व्यक्तीला बॅटने मारहाण करतानाचा व्हिडिओ समोर आला. त्यानंतर त्याच्यावर तीन गुन्हे दाखल करण्यात आले. वनविभागानेही खोक्या भोसलेवर कारवाई केली. वनविभागाच्या ताब्यातील जमीनीवर बांधलेल्या त्याच्या घरावर वनविभागाने नोटीस बजावली. आज नोटीशीला सात दिवस झाले तरीही उत्तर आले नाही. त्यामुळे वनविभागाने थेट बुलडोझर कारवाई केली आहे.