विशेष प्रतिनिधी
अकोला : वसतिगृहासाठी 5, 10, 15 कोटींचा निधी मागा. नाही दिला तर नाव सांगणार नाही. सरकारचा पैसा आहे, आपल्या बापाचं काय जातंय?, असे वादग्रस्त विधान सामाजिक न्यायमंत्री संजय शिरसाट यांनी करून नव्या वादाला तोंड फोडले आहे. ( It’s the government’s money, what’s going on with my father? Minister Sanjay Shirsat’s controversial statement again)
अकोला शहरातील निमवाडी परिसरातील डॉ. बाबासाहेब आंबेडकर सामाजिक न्याय भवनाच्या नूतन वास्तूचे लोकार्पण सामाजिक न्यायमंत्री संजय शिरसाट यांच्या हस्ते झाले. यावेळी भाषणादरम्यान त्यांनी केलेल्या एका वक्तव्याने अनेकांच्या भुवया उंचावल्या आहेत. शिवसेनेचे मंत्री-आमदार आणि वादग्रस्त वक्तव्य हे समीकरण झाले आहे. शिवसेनेचे सर्वेसर्वा एकनाथ शिंदे यांनी समज दिल्यानंतर आणि मुख्यमंत्री देवेंद्र फडणवीस यांनीही सुनावल्यानंतर वादग्रस्त मंत्र्यांची विधाने सुरूच आहे. मुख्यमंत्री देवेंद्र फडणवीस यांनी मंत्र्यांना खडेबोल सुनावून यापुढे असले काही सहन केले जाणार नाही, अशी तंबीदेखील नुकतीच मंत्रिमंडळ बैठकीत दिली होती.
या आधी शिवसेनेचे आमदार संजय गायकवाड यांनी आमदार निवासातील कॅन्टीन कर्मचाऱ्याला मारहाण केली होती, गृृह राज्यमंत्री योगेश कदम सावली बारमुळे वादग्रस्त झाले आहेत, तर संजय शिरसाट यांच्या बेडरुममधील कथित पैशांची बॅग आणि विट्स हॉटेल प्रकरण यामुळे सरकारला प्रचंड मानहानी सहन करावी लागली होती. शिवाय त्यांचे नेते एकनाथ शिंदेही टीकेचे धनी बनले होते. त्यांना एकनाथ शिंदेंनी समज दिल्यानंतर शिरसाट यांनी पुन्हा नवे वादग्रस्त वक्तव्य केले आहे.