भांडेवाडी प्रकल्प देशातील स्वच्छता क्रांतीचे नवे केंद्र ठरेल – मुख्यमंत्री देवेंद्र फडणवीस
नागपूर येथील भांडेवाडी कचरा प्रक्रिया प्रकल्पाची पाहणी करताना मुख्यमंत्री देवेंद्र फडणवीस यांनी हा प्रकल्प देशातील आधुनिक व शाश्वत कचरा व्यवस्थापनाचा आदर्श ठरेल, असा विश्वास व्यक्त केला. कचऱ्यातून गॅस, सेंद्रिय खत आणि इंधन निर्मिती करणारा हा प्रकल्प स्वच्छता आणि पर्यावरण संवर्धनाच्या दृष्टीने महत्त्वपूर्ण पाऊल असल्याचे त्यांनी सांगितले.
भांडेवाडी येथे उभारण्यात येत असलेल्या शहर घनकचरा प्रक्रिया केंद्रात आधुनिक तंत्रज्ञानाच्या माध्यमातून दररोज मोठ्या प्रमाणावर कचऱ्यावर प्रक्रिया केली जाणार आहे. या प्रक्रियेतून बायोगॅस, कंपोस्ट खत आणि इंधन निर्मिती होऊन कचऱ्याचे संसाधनात रूपांतर केले जाणार आहे.
मुख्यमंत्री फडणवीस यांनी यावेळी प्रकल्पाच्या विविध घटकांची माहिती घेत पर्यावरणपूरक आणि प्रभावी कचरा व्यवस्थापनासाठी आवश्यक बाबींवर प्रशासनाला सूचना दिल्या. स्वच्छता, शाश्वत विकास आणि नागरी सुविधांच्या उन्नतीसाठी अशा प्रकल्पांची भूमिका महत्त्वाची असल्याचेही त्यांनी नमूद केले.