पंतप्रधान नरेंद्र मोदी यांच्या आई हीराबेन यांच्यावर आम आदमी पार्टीच्या नेत्यांनी केलेल्या वादग्रस्त विधानामुळे चांगलेच राजकारण पेटले आहे. यावरुन स्मृती ईराणी यांनी दिल्लीचे मुख्यमंत्री आणि आम आदमी पक्षाचे प्रमुख अरविंद केजरीवाल यांना चांगलेच खडे बोल सुनावले आहेत.
आम आदमी पार्टी गुजरातचे प्रमुख गोपाल इटालिया यांनी पंतप्रधान नरेंद्र मोदींच्या आई हीराबेन यांच्यावर केलेल्या वादग्रस्त वक्तव्यावरून भारतीय जनता पक्षाने दिल्लीचे मुख्यमंत्री अरविंद केजरीवाल यांच्यावर जोरदार निशाणा साधला आहे. ‘आप’चे संयोजक अरविंद केजरीवाल यांच्या सांगण्यावरूनच पंतप्रधान मोदींच्या आईचा अपमान करण्यात आल्याचे केंद्रीय मंत्री स्मृती ईराणी यांनी म्हटले आहे. हे शब्द इटालियाचे असले तरी आदेश केजरीवाल यांचा असल्याचे स्मृती म्हणाल्या. केजरीवाल यांनी गुजरातच्या भूमीवर पंतप्रधानांच्या आईवर अशा प्रकारे भाष्य करावे, त्याला गुजरातची जनता उत्तर देईल, असे आव्हानही त्यांनी दिले.
स्मृती इराणी म्हणाल्या, “आप’चा नेता 100 वर्षीय महिलेचा अपमान करतो कारण त्या आईने एका मुलाला जन्म दिला ज्याने देशाचे आशीर्वाद मिळवून प्रधान सेवकाचे कर्तव्य पार पाडले. अरविंद केजरीवाल यांना माहित आहे की त्यांचे गुजरातचे नेते हिंदू समाजाचा अपमान करत राहिले, मंदिरातील स्त्रीच्या भूमिकेवर मर्यादा ओलांडून टिप्पणी केली आणि आता या नेत्याने प्रधानसेवकाच्या 100 वर्षांच्या वृद्ध मातेचा अपमान केला आहे कारण त्यांना आपले राजकीय चमक दाखवायचे आहे.” असा हल्लाबोल इराणी यांनी केला.
गोपाल इटालिया जे काही बोलले ते अरविंद केजरीवाल यांच्या सांगण्यावरूनच बोलले, असा स्मृती यांनी अनेकदा पुनरुच्चार केला. इराणी म्हणाल्या, “अरविंद केजरीवाल यांच्या सूचनेशिवाय कोणताही प्रवक्ता, लोकप्रतिनिधी एक शब्दही उच्चारत नाही. गुजरातच्या एका नेत्याचा हा शब्द जरी तुम्हाला वाटत असला तरी आदेश केजरीवालांचा आहे. या नेत्याने प्रथमच सन्मानाचे उल्लंघन केले आहे का? केजरीवाल यांना त्यांचे नेते कशा प्रकारची विधाने करत आहेत हे कळत नाही का? पंतप्रधान मोदींच्या आईचा अपमान करण्यासाठी केजरीवाल यांच्या सूचनेवरून हे जाणूनबुजून करण्यात आले. शब्द केजरीवाल यांच्या नेत्याचे असावेत, आदेश केजरीवालांचा होता.” अशी भूमिका इराणी यांनी मांडली.