आम्ही एकत्र राहण्याचे ठरवले आहे, अजित पवार यांचा ठाम विश्वास

पुणे : महायुतीतील तिन्ही पक्षांना त्यांचा पक्ष वाढविण्याचा अधिकार आहे. त्यामुळे तुम्ही किती उलट सुलट प्रश्न विचारा. तुम्ही काही केलं तरी आम्ही एकत्र राहण्याचे ठरवले आहे, असा ठाम विश्वास उपमुख्यमंत्री अजित पवार यांनी व्यक्त केली. (We have decided to be together, Ajit Pawar firmly believes)

जुन्नरचे अपक्ष आमदार शरद सोनवणे यांनी शिवसेना शिंदे गटात प्रवेश केला. यावेळी पुणे जिल्हा भगवा करू असे उपमुख्यमंत्री एकनाथ शिंदे म्हणाले. यावर पत्रकारांनी विचारले असता अजित पवार  म्हणाले, खऱ्या बातम्या द्यायला सुरुवात करा. तुम्ही काही केलं तरी आम्ही एकत्र राहण्याच ठरवल आहे. उद्या मी कुठल्या जिल्ह्यात गेलो तरी हा राष्ट्रवादीचा जिल्हा करू असं म्हणेल. प्रत्येकाला पक्ष वाढवण्याचा अधिकार आहे. ते शिवसेनेचे नेते आहेत. पुणे जिल्हा भगवा करायचा आहे, असे म्हणणाच. ते महाराष्ट्रात गेल्यानंतर प्रत्येक जिल्ह्यात तसं सांगू शकतात. देवेंद्र फडणवीस प्रत्येक जिल्ह्यात गेले तर ते सांगू शकतात मी गेलो तर मी सांगू शकतो. तुम्ही किती उलट सुलट प्रश्न विचारा आम्ही एकत्र राहण्याचा निर्णय घेतला आहे. जनतेच्या हातात आहे कुणाच्या हातात सूत्र द्यायची, कोणाच्या हातात सूत्र द्यायची नाही.

शिवसेना ठाकरे गटाचे नेते वसंत मोरे यांनी स्वारगेट बसस्थानक कार्यालयाच्या केलेल्या तोडफोडीवर ते म्हणाले, पूर्ण तपास होऊन सत्यता पुढे येऊ द्या.एखादा आरोपी सापडत नाही म्हणून तोडफोड करत असाल तर स्वतःला वेगळं दाखवण्याचा प्रयत्न कराल. सार्वजनिक मालमत्तेचे नुकसान कोणी करत असेल तर तो पक्ष किंवा त्या कार्यकर्त्यांकडून वसूल केले पाहिजे, असं कोर्टाने सांगितलं आहे.राग व्यक्त करण्याच्या काही गोष्टी असू शकतात. काही अतिउत्साही कार्यकर्त्यांचा उत्साह पाहायला मिळतोय. त्यांच्यावरही कायद्याच्या चौकटीत राहून कारवाई केली जाईल.

तानाजी सावंत यांचे टेंडर रद्द केलं आहे त्याबाबत मी माध्यमात वाचलं आहे.  मी पूर्ण माहिती घेऊन या प्रकरणात लक्ष घालेल. या गोष्टीची शहानिशा करेल, असे ते म्हणाले.