गैरकृत्य पाेटात घ्या म्हणणाऱ्यांना लाज, शरम कशी वाटत नाही, अजित पवार यांचा संताप

विशेष प्रतिनिधी

बारामती : कोणी काही गैरकृत्य केलं आणि त्यानंतर माझ्याकडे येतात आणि म्हणातात दादा, पोटात घ्या. अरे काय पोटात घ्या? पोट फुटायला लागलंय. ज्यांनी फोन केला त्यांना लाज, शरम कशी वाटत नाही, असा संताप व्यक्त करत अगदी जवळच्या कार्यकर्त्याचा मुलगा असेल आणि गुन्हे करत असेल तर मकाेका लावायला कमी करणार नाही, असा दम दिला आहे. ( Shame on Those Who Say Swallow the Wrongdoing Ajit Pawar Expresses Outrage_

बारामतीमधील मारहाणीचा एक व्हिडिओ व्हायरल झाला आहे. यावरून संताप व्यक्त करताना अजित पवार म्हणाले, बारामतीत विकास कामे करतो आहे. पण काही जण वेडे वाकडेपणा करतात. एक जण तर फुटपाथवर गाडी लाऊन गप्पा मारत होते. पोलिसांना गाडी जप्त करायला सांगितली आहे. एक व्हिडिओ तुम्ही पाहिला असेल, त्यामध्ये दोन मोटरसायकलवरुन चार मुलं आली. त्यांनी एकाला मारमार मारलं. त्याला बेल्ट, लाथा-बुक्क्यांनी मारहाण केली. अजित पवारांच्या कितीही जवळच्या कार्यकर्त्याच्या मुलाने असं केलं तरी त्याला सोडणार नाही. तो असेच गुन्हे करत राहिला तर मकोका लावायला कमी करणार नाही.

अजित पवार म्हणाले, ‘वनवे, पार्किंग, गार्डन अशा सर्व सार्वजनिक ठिकाणी कोणतेही गैरकृत्य खपवून घेतले जाणार नाही. पोलिसांनाही एक स्पेशल गाडी दिली जाईल, त्यांनी या सर्वांवर नजर ठेवायची आहे. कोणाचंही चुकीचं कृत्य खपवून घेतले जाणार नाही. गैरकृत्य करणारा अजित पवारांच्या कितीही जवळचा असला, तरी त्याला माफी नाही. कोणी काही चूक केली असेल तर त्यासाठी कायदेशीर मार्ग आहे. त्यांची पोलिसांकडे तक्रार करा, पण कोणीही कायदा हातात घेतला तर त्याला मकोका लावायला कमी करणार नाही, असा इशारा अजित पवार यांनी बारामती येथील कार्यक्रमात दिला.