महाविकास आघाडीतही नेत्यांची पळवापळवी, पदांसाठी खो खोचा खेळ, पवारांचा नेता काँग्रेसने पळवला

विशेष प्रतिनिधी

मुंबई : महाविकास आघाडीतील तिन्ही पक्षांच्या नेत्यांकडून घाऊक प्रमाणावर पक्षांतरे होत आहेत. बहुतांश नेते महायुतीतील तीन पक्षांपैकी एकात जात आहेत. मात्र जागा रिकाम्या झाल्याने महाविकास आघाडीतही नेत्यांची पळवापळवी सुरू झाली आहे.

( Defections Within MVA Congress Poaches Pawars Leader Amid Power Struggle)

भाजप, शिवसेना शिंदे गट, राष्ट्रवादी अजित पवार गट यांनी गेल्या काही दिवसात राष्ट्रवादी काँग्रेसच्या शरद पवार गटाला अनेक धक्के दिले आहेत. आता तर काँग्रेसनेच शरद पवार यांचा मराठवाड्यातील नेता पळवला आहे.

शरद पवारांच्या राष्ट्रवादी काँग्रेसचे मराठवाड्यातील मोठे नेते आणि परभणीचे जिल्हाध्यक्ष बाबाजानी दुर्राणी यांनी पक्ष सोडण्याचे निश्चित केले असल्याचे मानले जात आहे. बाबाजानी दुर्राणी हे सत्ताधारी पक्षात प्रवेश करणार नसून काँग्रेसमध्ये प्रवास करणार असल्याची चर्चा आहे. येत्या 7 ऑगस्टला त्यांचा मुंबईत काँग्रेस मुख्यालयात पक्ष प्रवेश होणार आहे. बाबाजानी दुर्राणी यांच्या समर्थकांकडून त्यांच्या काँग्रेस प्रवेशाचे बॅनर सोशल मीडियावर झळकत आहेत.

गेल्या काही दिवसांपासून बाबाजानी दुर्राणी शरद पवारांच्या राष्ट्रवादीत अस्वस्थ आहेत. ते अजित पवार गटात प्रवेश करणार असल्याचीही चर्चा होती. मात्र काही दिवसांपासून त्यांच्या काँग्रेस नेत्यांसोबतच्या भेटीगाठी वाढल्या. आता ते येत्या 7 तारखेला काँग्रेसमध्ये प्रवेश करणार असल्याचे पोस्टर्स सोशल मीडियावर देखील व्हायरल झाले आहेत. त्यामुळे हा शरद पवारांच्या राष्ट्रवादीला मोठा धक्का मानला जात आहे.

परभणी जिल्ह्यातील काँग्रेसचे नेते, माजी राज्यमंत्री सुरेश वरपूडकर आता भारतीय जनता पक्षात आहेत. ते भाजपवासी झाल्यामुळे जिल्ह्यात काँग्रेसकडे कोणताही मोठा नेता नाही. दुर्राणी यांनी काँग्रेसमध्ये प्रवेश केल्यास त्यांना मोठी जबाबदारी मिळण्याची चर्चा आहे.

बाबाजानी दुर्राणी हे परभणीतील मोठे नेते आहेत. 2004 मध्ये ते विधानसभा निवडणुकीत विजयी झाले होते. 2012 आणि 2018 असे सलग दोनदा शरद पवारांनी त्यांना विधान परिषदेवर पाठवले होते. राष्ट्रवादी काँग्रेसमध्ये फूट पडल्यानंतर दुर्रानी अजित पवारांसोबत गेले होते. मात्र तिथे त्यांच्या हाती काही लागले नाही आणि ते पुन्हा शरद पवारांसोबत गेले. आता शरद पवारांची साथ सोडून ते काँग्रेसच्या वाटेवर आहे. परभणी काँग्रेसमध्ये निर्माण झालेली पोकळी त्यांच्यामुळे भरून निघण्याची शक्यता आहे.