विशेष प्रतिनिधी
पाटणा :बिहार विधानसभा निवडणुकीच्या पार्श्वभूमीवर देशातील १६ प्रमुख वृत्तसंस्था आणि सर्वेक्षण संस्थांनी जाहीर केलेल्या पोल ऑफ पोल्स मध्ये पुन्हा एकदा एनडीए आघाडीवर असल्याचे स्पष्ट दिसून आले आहे. बहुतांश सर्वेक्षणांनुसार एनडीएला १४५ ते १६० जागा, तर महागठबंधनाला ७३ ते ९१ जागा मिळतील, असा अंदाज वर्तविण्यात आला आहे. ( Exit polls predict clear majority for NDA Grand Alliance behind)
सर्व १६ एक्झिट पोल्सचा सरासरी विचार केला असता एनडीएला १५४ जागा, तर महागठबंधनाला ८३ जागा मिळतील, असे एकंदर चित्र उभे राहते. या निकालांवरून बिहारमध्ये पुन्हा एकदा भगवा फडकणार, असा अंदाज राजकीय वर्तुळात व्यक्त केला जात आहे.
राजकीय विश्लेषकांच्या मते, पंतप्रधान नरेंद्र मोदींच्या लोकप्रियतेचा प्रभाव, केंद्र आणि राज्य सरकारांनी राबवलेल्या विविध योजनांचा परिणाम, तसेच विरोधकांमधील अंतर्गत मतभेद हे एनडीएच्या आघाडीचे मुख्य घटक आहेत.
जेडीयू–भाजपा आघाडी ग्रामीण भागात बळकट राहिली असून, शहरी मतदारांमध्येही एनडीएला मोठा प्रतिसाद मिळत असल्याचे सर्वेक्षणांमध्ये नमूद केले आहे.
महागठबंधनाचे नेतृत्व करणाऱ्या राजद–काँग्रेस आघाडीला काही ठिकाणी विशेषतः उत्तर बिहारमध्ये चांगला प्रतिसाद मिळाला आहे. तथापि, बहुतांश सर्वेक्षणांमध्ये एनडीए आघाडीवर राहिल्याचे दिसून येते. राजदने काही जिल्ह्यांमध्ये मजबुती दाखवली असली तरी राज्यव्यापी पातळीवर ती पुरेशी नाही, असे निरीक्षण तज्ज्ञांनी नोंदवले आहे.
“इतर” गटात एआयएमआयएम, एलजेपी (रामविलास पासवान), आणि अपक्ष उमेदवारांचा समावेश असून, या गटाला ५ ते १० जागा मिळण्याचा अंदाज आहे. काही ठिकाणी हे उमेदवार निर्णायक ठरू शकतात, अशी शक्यता वर्तविण्यात येत आहे.
पोल ऑफ पोल्सचा सारांश
क्र. सर्वेक्षण संस्था एनडीए महागठबंधन इतर
1 दैनिक भास्कर 145–160 73–91 5–10
2 मॅट्रिक्स–IANS 147–167 70–90 0–7
3 पीपुल्स पल्स 133–159 75–101 2–13
4 पीपुल्स इनसाइट 133–148 87–102 3–8
5 चाणक्य 130–138 100–108 3–5
6 पोलस्ट्रेट 133–148 87–102 3–5
7 JVC’s Polls 135–150 88–103 3–6
8 पोल डायरी 184–209 32–49 1–5
9 टाइम्स नाऊ 143 95 5
10 प्रजा पोल अॅनालिटिक्स 186 50 7
11 पी मार्क 142–162 80–98 3–8
12 TIF रिसर्च 145–163 76–95 3–6
13 न्यूज 24 (कामाख्या अॅनालिटिक्स) 167–187 54–74 2–9
14 डीव्ही रिसर्च 137–152 83–98 3–12
15 न्यूज 18 140–150 85–95 5–15