मुंबईच्या माजी महापौर आणि उद्धव ठाकरे गटाच्या उपनेत्या किशोरी पेडणेकर यांच्या अडचणीत मोठी वाढ झाल्याचे समोर आले आहे. किशोरी पेडणेकर यांच्याविरोधात मनी लॉन्ड्रिंग प्रकरणी पीएमएलए कायद्यांतर्गत गुन्हा दाखल करण्यात आला आहे. ईडीकडून किशोरी पेडणेकर आणि माजी अतिरिक्त आयुक्तांविरोधात हा गुन्हा दाखल करण्यात आला आहे. किशोरी पेडणेकर यांच्यावर कोरोना काळात अधिक दराने बॉडी बॅग खरेदी करून घोटाळ्याचा आरोप आहे.
महिन्याभरापूर्वी ईडीनं पेडणेकरांविरोधातील आरोपांप्रकरणाची कागदपत्रे मुंबई पोलिसांच्या आर्थिक गुन्हे विभागाकडून मागवली होती. या विभागाकडून पेडणेकरांवर गुन्हाही दाखल करण्यात आला होता. याच गुन्ह्याच्या आधारे कागदपत्रे तपासल्यानंतर ईडीनं किशोरी पेडणेकर यांच्याविरोधात गुन्हा दाखल केला आहे.कोविड काळात मुंबई महापालिकेकडून पालिकेच्या रुग्णालयांसाठी मृतदेहांच्या बॅग खरेदी करताना 1800 रुपयांची एक बॅग 6800 रुपयांना विकत घेतल्याचं सांगितलं जात आहे. तत्कालीन महापौर किशोरी पेडणेकर यांच्या सुचनेनुसार हा व्यवहार झाल्याचा आरोप करण्यात आला आहे.
ईडीने डेड बॉडी बॅग घोटाळ्याप्रकरणी अंमलबजावणी प्रकरण माहिती अहवाल नोंदविला आहे. कोविड-19 प्रेरित महामारीदरम्यान महापालिकेच्या च्या कामकाजातील अनियमिततेच्या संदर्भात ईडीने नोंदवलेला हा दुसरा मनी लाँडरिंगचा गुन्हा आहे.याआधी, कोविड जंबो सेंटर घोटाळ्याप्रकरणी पीएमएलए गुन्हा दाखल झाला आणि जुलैमध्ये त्यांनी शिवसेना नेते संजय राऊत यांचे निकटवर्तीय सुजित मुकुंद पाटकर (45) आणि नागरी डॉक्टर किशोर बिसुरे (55) यांना अटक केली.
ईडी चे सध्याचे प्रकरण (बॉडी बॅग घोटाळा) मुंबई पोलिसांच्या आर्थिक गुन्हे शाखेच्या अधिकाऱ्यांनी पेडणेकर, नागरी अधिकारी आणि इतरांविरुद्ध 4 ऑगस्ट रोजी नोंदवलेल्या एफआयआरवर आधारित आहे. मृत कोविड-19 रूग्णांसाठी बॉडी बॅग खरेदीमधील कथित अनियमिततेच्या चौकशीसाठी हा खटला दाखल करण्यात आला होता.पेडणेकर आणि इतर वरिष्ठ नागरी अधिकार्यांवर भारतीय दंड संहितेच्या कलम 409 (लोकसेवक किंवा बँकर, व्यापारी किंवा एजंटद्वारे विश्वासाचा भंग करणे), 420 (फसवणूक) आणि 120B (गुन्हेगारी कट) अंतर्गत गुन्हा दाखल करण्यात आला.