अंजली दमानियांवर सुपारीबाज आणि रिचार्जवर चालणारी बाई वक्तव्यामुळे सूरज चव्हाण अडचणीत

विशेष प्रतिनिधी

मुंबई : राष्ट्रवादी काँग्रेस (अजित पवार गट) चे प्रवक्ते सूरज चव्हाण यांच्यावर सामाजिक कार्यकर्त्या अंजली दमानिया यांच्याबाबत केलेल्या वादग्रस्त वक्तव्यामुळे आता कायदेशीर कारवाईचा फटका बसू शकतो. “सुपारीबाज आणि रिचार्जवर चालणारी बाई” अशा शब्दांत त्यांनी दमानिया यांच्यावर टीका केली होती. याच प्रकरणी वांद्रे कोर्टाने गुरुवारी सूरज चव्हाण यांना नोटीस बजावली असून २८ जुलै रोजी न्यायालयात हजर राहण्याचे आदेश दिले आहेत. (Suraj Chavan in trouble for his statement on Anjali Damania a betel nut seller and a woman who runs on recharge)

सूरज चव्हाण यांनी आपल्या पोस्टमध्ये म्हटले होते की, “धनंजय मुंडे यांच्यावर आरोप करणाऱ्या रिचार्जवाल्या ताईच्या खात्यावर २५ खोक्यांचा बॅलन्स टाकण्यात आला आहे. काहीही न करता वर्षाला १५ देश फिरणारी आणि अडीच कोटींचा टॅक्स भरणारी ही स्वयंघोषित समाजसेविका कोणाच्या माध्यमातून रिचार्ज झाली, हे लवकरच उघड करणार आहोत.” या वक्तव्यामुळे संतप्त झालेल्या अंजली दमानिया यांनी वांद्रे कोर्टात मानहानीची याचिका दाखल केली. गुरुवारी झालेल्या सुनावणीत कोर्टाने चव्हाण यांना नोटीस बजावली आणि त्यांच्या उपस्थितीचे आदेश दिले.

दमानिया यांनी सरपंच संतोष देशमुख हत्या प्रकरण आणि कृषी घोटाळ्यावरून धनंजय मुंडे यांच्यावर गंभीर आरोप केले होते. त्यांनी आरोप केला होता की, मंत्रिमंडळाची मंजुरी न घेता खोटा शासनादेश काढून शेकडो कोटींची रक्कम लाटली गेली. यावरच चव्हाण यांनी दमानिया यांच्यावर वादग्रस्त पोस्ट लिहिली होती.

सुनावणीनंतर अंजली दमानिया म्हणाल्या, “मी ‘सुपारीबाज’ आणि ‘रीचार्जवर चालणारी बाई’ असल्याचा आरोप केला गेला. मी आज मुख्यमंत्री देवेंद्र फडणवीस आणि उपमुख्यमंत्री अजित पवार यांना आव्हान देते की, माझ्या सर्व बँक खात्यांची तातडीने चौकशी करा. जर मी भ्रष्ट असेन, तर मला शिक्षा झालीच पाहिजे, पण नसेल तर सूरज चव्हाण यांना कायदेशीर शिक्षा दिली गेली पाहिजे. महाराष्ट्राच्या मीडियाला जर खरंच माझ्या लढ्याबद्दल आदर वाटत असेल, तर आजच या मुद्द्यावर फडणवीस आणि अजित पवार यांनी प्रतिक्रिया द्यावी.”